Ringverknader til lokalt næringsliv 

Fatland Ølen investerer for framtida. Utbygginga gir slakteriet større musklar, men kjem også lokalt næringsliv til gode. Ei rekkje lokale bedrifter har fått storkontraktar for leveransar til utbygginga.

Grave- og støypearbeid viser godt att i landskapet rundt slakteriet i Ølen og er starten på ei utbygging og opprusting av anlegga til om lag 250 millionar kroner, som skal stå ferdig i mars 2016. 

Teknisk leiar Inge Fatland er glad for at mange av millionane som blir investert i den nye utbygginga blir verande i distriktet, og rosar det lokale næringslivet for gode og trygge leveransar. 

- Det er ein styrke for lokalmiljøet vårt at alle desse tenestene kan handlast lokalt, seier han.  

Mange lokale leverandørar 

Noregs sjette største entreprenør - Kruse Smith - har fått hovudkontrakten for grunnarbeid, betong- og elementarbeid, men Fatland har lagt vekt på bruken av lokale underleverandørar. Mellom anna blir all graving utført av Vikedal Mur & Anlegg (VMA), som også tidlegare har hatt mange oppdrag for Fatland.

- Fatland har vore ein av våre trufaste kundar i mange år, og denne jobben er ein av dei større med oppdrag for fire gravemaskinar og ein dumper. I tillegg til jobben for Fatland har me òg hatt eit oppdrag for Skånevik Ølen Kraftlag med omlegging av straumkabel rundt sjølve anleggsområdet, fortel Jan Egil Søndenå i VMA.

VMA sin del av grunnarbeidskontrakten på totalt 40 millionar kroner utgjer 3-4 millionar kroner.

Ein annan lokal underleverandør er Ølen Betong, som leverer ferdigbetong og element. Berre til golv reknar Fatland med at det går med 1200 kubikkmeter betong, og totalt nærare 3000 kubikkmeter. Elementa har dei siste tre månadane vore under produksjon ved Ølen Betong sitt anlegg på Sandeid.

- Samla har kontrakten til Ølen Betong ein verdi på over 20 millionar kroner - om lag 15 millionar kroner i element og 5-6 millionar i ferdigbetong, fortel Fatland.

Kortreist elektro, røyr og stål 

Helgevold Elektro har vore fast leverandør av el-tenester til Fatland dei siste 15-20 åra, og har også fått ein stor kontrakt direkte med slakteriet i samband med utbygginga.

- Verdien på denne kontrakten er på rundt 8-10 millionar kroner, fortel Fatland.

Røyrlegging og alt innan varme-, ventilasjons- og sanitærteknikk (VVS) skal Rørlegger Haraldseid i Skjold ta seg av. Dagleg leiar hos Rørlegger Haraldseid, Knut Inge Haraldseid, reknar med å ha 2-3 personar gåande på utbyggingsprosjektet.

- Det er ein stor jobb for oss, og som ved den førre utbygginga hos Fatland så har me god hjelp frå Bjelland VVS i Haugesund, fortel Haraldseid.

- Fatland er ein av våre større kundar, og det blir jo ekstra stort når det er snakk om nybygg der me er med frå starten med legging av leidningsnett i grunnen og alt arbeidet med installasjon av VVS-utstyr i produksjonsanlegga, seier ein nøgd Haraldseid, som ikkje veit kva den endelege storleiken på kontrakten blir før alle varene er levert.

Stålelement hentar Fatland frå Finland, men Etne-verksemda MCE har fått jobben med sjølve stålbygget, som skal utgjera 3. etasje i nybygget, samt all anna stålkonstruksjon. MCE sin kontrakt har ein verdi på om lag to millionar kroner.

Dagleg leiar Asbjørn Aarekol i MCE reknar med å ha to til fire medarbeidarar i sving under monteringsarbeidet i Ølen.

- Me er ofte inne på slakteriet på vedlikehaldsoppdrag, men det er jo ekstra hyggeleg å bli ein av hovudleverandørane og vera med på nybygg som dette, seier Aarekol.

- Me har etter kvart god erfaring med slike oppdrag, og det blir som ein rutinejobb å rekne. MCE har sett opp fleire hallar i distriktet; nokre sjølvstendige bygg, andre kopla saman med eksisterande bygningsmasse. Ein del av jobben vår denne gongen blir å knyta det nye bygget saman med det gamle, fortel Aarekol.

God erfaring med lokale leverandørar 

- Me har svært gode erfaringar med dei lokale leverandørane, og har mellom anna MCE som fast leverandør på skap til dyretransportane våre. Berre i år har me handla skap for rundt fem millionar kroner frå Etne, fortel Fatland.

Sjølv om mykje blir handla lokalt, så må Fatland til utlandet for å finna noko av det utstyret som skal installerast i nybygget. Automatar og robotar må han til Danmark og Tyskland for å skaffe seg.

- Dette er utstyr me nok diverre ikkje finn lokalt, seier Fatland.

Lokal arbeidskraft til drift er mangelvare 

Det same seier han òg om tilgangen på lokal arbeidskraft til drift av anlegga. Sjølv med tronge tider i bransjar som olje og gass, så merkar han heller liten pågang frå lokale og andre norske kandidatar slik mange andre bedrifter i regionen melder.

- Dette trur eg skuldast at det her lokalt er tåleg bra med jobbar, og sjølv om det spesielt innan olje- og gassnæringa blir ein del overtalige, så slår ikkje det ut hos oss.

Fatland legg til at dei likevel kan ha bruk for fleire lokale arbeidstakarar innan ulike disiplinar. Sjølv om han ikkje reknar med stor auke i arbeidsstokken som følge av utbyggingane, så er det berre å melde interesse.

- Av erfaring veit eg at det fort blir trong for litt auke i mannskapsstyrken sjølv om mykje skal automatiserast, og lokale arbeidstakarar er sjølvsagt velkomne til å kontakta oss for oppdrag.