Rogaland fylkeskommune har med seg kommunane Vindafjord, Stavanger, Klepp, Time og Hå, samt Statsforvaltaren i Rogaland med i oppstarten av biogassnettverket. Leiaren av nettverket, Helga Hellesø er til dagleg leiar ved Rogaland Landbrukspark og meiner biogassnettverket kan bli viktig for å stimulere til ytterlegare vekst i næringa.
Biogass
-
Biogass blir danna når organisk materiale, som gjødsel, matavfall, planterestar, avløpsvatn og anna blir brote ned av mikroorganismar i oksygenfritt miljø. Biogass består i hovudsak av metan. Ved forbrenning blir det danna CO2 og vatn. Sidan råstoffet kjem frå biologisk materiale blir forbrenninga rekna som CO2-nøytral sidan denne går inn i det naturlege CO2-kretsløpet. Biogass kan utnyttast til å produsere straum, varme og drivstoff.
(Kjelde: Miljødirektoratet)
– Formålet med å få nettverket på plass er å støtte opp om dei initiativa som finst i Rogaland, å få på plass biogass-produksjon er viktig for å redusere klimagassutslepp og styrke landbruket, meiner ho.
Anne Sofie Sandvik i Vindafjord kommune meiner satsinga og nettverksbygginga blir sentral for å styrke næringa, og spesielt aktuelt i Vindafjord no på grunn av satsinga til Biovind.
Les meir om Rune Furseth og satsinga på Biovind
Bruk av avfallet
Helga Hellesø viser også til at nøkkelen framover blir å finne fram til gode løysingar for bruk av bioresten, avfallsstoffet som ligg igjen etter ferdig gassproduksjon.
– Me har mykje husdyrgjødsel i Rogaland, så det er mange forutsetningar for at ein skal lukkast med å produsere gass av gjødsel. Men me treng å jobbe endå meir med å finne ut kva avfallet skal brukast til, ein del av det vil gå tilbake til bøndene som gjødsel, men her kan me og bli påverka dersom det kjem på plass strengare restriksjonar for spreieareal og mengde gjødsel ein kan må kvitte seg med.
Rogaland biogassnettverk er finansiert av Rogaland fylkeskommune som ein del av satsingsområdet avfall som ressurs og auka bruk av restråstoff i «Strategi for bioøkonomi 2018-2030». Arbeidet er også støtta av Miljødirektoratets Klimasatsordning.
Les meir om den grøne næringsparken på Nerheim i Ølen
Bygge kunnskap
Det er fem ulike biogass-bedrifter i Rogaland som skal presentere sitt arbeid på oppstartsmøtet fredag. Forutan Rune Furseth og Biovind som allereie har fått plass i det nye næringsarealet på Nerheim i Ølen er det også Årdal Bio, Bioenergi Finnøy, Den Magiske Fabrikken Jæren og Biogass Konsortium, Jæren Biogass og Jæren Biopark.
– Me ynskjer at desse ulike samarbeidspartnarane kan bli kopla saman og dra nytte av kvarandre. Det er viktig for oss å kunne både spreie og bygge kunnskap og kompetanse med dette nettverket, i tillegg til at me ynskjer å gjere biogass-satsinga i Rogaland meir synleg, seier Hellestø.
