Overtar plassen til Borgland Dolphin
Etter ei to år lang jordomsegling, legg Polar Pioneer til kai i Ølensvåg. Plattformen tar over plassen til boreriggen Borgland Dolpin som seglar frå verftet i midten av mars.
Tekst: Kari Aakra. Foto: Ellen Marie Hagevik og Kari Aakra
Publisert: 24.02.2016
Torsdag morgon ankra Polar Pioneer opp i Ølensfjorden, etter at plattforma segla inn fjorden på måndag. Dei siste to åra har Polar Pioneer segla jorda rundt etter førre besøk hjå Westcon i 2014.
Ferda gjekk då frå Ølensvåg til Singapore, vidare på oppdrag for Shell i Alaska, deretter via Seattle, rundt sør-Amerika og nå tilbake til Ølensvåg. Her skal Polar Pioneer liggja i opplag inntil vidare.
- Plattforma kom inn på tunglastfartøyet Dockwise Vanguard og skal koplast av skipet nå før helga. Polar Pioneer vil ankra opp i fjorden og liggja der inntil han overtar plassen til Borgland Dolphin ved kai nummer 1 hjå oss i midten av mars, fortel assisterande leiar for rig på Westcon, Gunnar Norheim.
Polar Pioneer er eigd av Transocean, veg nærare 45 000 tonn og er bygd for operasjonar i særlige barske klima. Og i vår skal Polar Pioneer igjen ruva ved kaien i Ølensvåg.
Riggen overtar for Borgland Dolphin som sidan 19.januar har vore inne hjå Westcon for inspeksjons- og vedlikehaldsarbeid. Framleis vil det altså liggja tre riggar til kai i Ølensvåg.
Westcon er i innspurten av arbeidet med Prosafe-riggen Safe Scandinavia som la til kai i mars 2015, samstundes som arbeidet med femårsklassifiseringa på Transocean-eigde Henry Goodrich held fram til ca 15.mars.
