Fredag og laurdag feirer Fatland opninga av nytt produksjonanlegg.
Mat- og landbruksminister Jon Georg Dale markerer opninga av det nye anlegget med kombinert snorklypping/kjøttdeigpakking på Fatland. Foto: Torbjørn Tandberg
Fatland har investert rundt 250 millionar kroner i nytt og utvida anlegg i Ølen. Fredag skal landbruksminister Jon Georg Dale stå for «snorklyppinga»; Han får trykkja på knappen som set i gang verdas raskaste kjøttdeig-pakkemaskin.
Maskinen pakkar 160 pakkar kjøttdeig i minuttet og er ein av nyinvesteringane hjå Fatland Ølen. Til saman er det investert 150 millionar kroner i utstyr i det nye anlegget. Sjølve bygget har ein prislapp på 100 millionar. Anlegget i Ølen er bygd ut med 12 000 kvadratmeter over tre plan, ei utbygging som vil dobla produksjon av pakka varer.
Fatland markerer opninga av det nye produksjonsanlegget med open dag på laurdag, og inviterer produsentar, leverandørar, kundar og naboar på omvisning og grillmat.
Les fleire saker frå Fatland:
Fatland-gruppen kunne kvittera med ei rekordomsetning på nærare fire milliardar kroner i fjor, og har satsa stort på bygging og automatisering dette året.
- Me har fått nye kundar og satsar på god produktutvikling og effektivisering. Stor arbeidsinnsats i alle ledd frå bonde til butikk er med på å bidra til veksten. Kundar i daglegvarebransjen blir større, og me må veksa vidare framover for å møta førespurnaden, fortel konsernsjef i Fatland AS, Terje Wester.
